Galego   GALEGO


Turismo, Cultura, Historia de Galicia: Ourense e Pontevedra

 



PUBLICACIÓN DE MATEO FONTÁN COUTO

Mateo Fontán Couto Autor: Mateo Fontán Couto. Historia, Arqueoloxía, Natureza

Podes seguilo tamén en:

» facebook

→ OUTRAS PUBLICACIÓNS DE MATEO FONTÁN COUTO NESTA WEB




A Figura Da «Fama» Na Praza Do Peirao

Data: 6 de febreiro 2016

Debuxo conxectural de Alcoverro no que vemos a Fama coroando a fonte da Ferrería
(Imaxe http://pontevedracuriosa.blogspot.com.es/2015/03/la-puerta-de-trabancas-y-la-herreria.html)

Pontevedra posúe fermosas fontes que engalanan a cidade e falan do seu devir histórico-artístico. Sen dubida, a máis famosa delas é a da Ferrería sita na veciña Praza de Ourense. Esta é a fonte que «da de beber a quen pasa» tal e como reza a copla. Trátase dun manancial renacentista a imitación dos «chafarís» portugueses e cuxa historia está chea de avatares. Foi erguida no século XVI, restaurada no XVIII, derrubada no XIX e reedificada en 1928. 

En orixe a fonte foi redonda con tres cuncas, de belida factura e con unha interesante simboloxía outorgada polos escudos e emblemas que posúe. Ergueuse na parte sur da Ferrería como obra municipal e grazas a unha cédula de Carlos V concedida en 1537. Foi obra concibida por Joao Lopes «o velho» a imitación das que se atopaban nas cidades de Caminha e Viana do Castelo, aínda que ao longo do tempo intervirán outros mestres, como Domingos Fernandes, na súa feitura. A fonte foi gabada dende moi cedo deixándonos impresións dela Ambrosio Morales ou Fray Martin Sarmiento.

Chegado o século XVIII acométense reformas tanto no entorno coma na propia fonte. É agora cando encárgase a Pedro de Moldes a elaboración dunha figura que representase á Fama para o remate da fonte, xa que este estaba roto. O encargo tiña un mes de prazo e estaría feita en pedra de cantería fina, con unha bara de tamaño, e máis unha peaña de base. Ao latoeiro Francisco Gilarde encargóuselle, entre outras cousas, unha trompeta de cobre de media bara de longo para completar a alegoría da Fama. Corría o Nadal de 1788. A reforma da fonte da Ferrería estará marcada por varios incidentes e preitos ata 1790. A inicial obra renacentista xa non era a mesma tras as acometidas de repintes, repiques, instalación de barreiras, e con engadidos como outro pío e a figura da Fama. 

Á fonte aínda lle quedaban cousas que vivir, pasando polo seu desmantelamento en 1857 e a súa posterior reconstrución en 1928 a expensas da Sociedade Arqueolóxica de Pontevedra, a cal conservou a maioría das pezas e acometeu amorosamente o seu novo levantamento no actual sitio após a supervisión e traballo de figuras como Casto Sampedro, Castelao ou o arquitecto Salgado. Nesta reconstrución deixouse de colocar, xunto outras poucas pezas, a figura da Fama de Pedro de Moldes. En decembro de 2010 a fonte someteríase a unha restauración integral.

 

 

Fonte da Praza do Peirao (Imaxe: Mateo Fontán Couto)

Aquí damos un chimpo ata a Praza do Peirao que foi onde foi parar a imaxe da Fama en 1928 para coroar outra fonte que alí se atopa. Esta, é obra de Alejandro Rodríguez Sesmero –ao que tantas construcións emblemáticas debemos na nosa cidade– de 1876, adxudicada ao contratista José Barcia y Barcia por 1.245 pesetas. Xunto a figura da Fama engadiuse á fonte unha cunca tamén procedente do chafarís da Ferrería que tampouco utilizárase na reconstrución. Adquiriría desta maneira a fonte da Praza do Peirao un aspecto de gosto barroco, trocando a traza orixinal que Sesmero ideara e que se conserva no Arquivo Histórico Provincial.

Alí pois, foi a parar esta antiga alegoría, personificación dos rumores –sexan certos ou non– e da fama. Está sen a trompeta que a caracteriza pero facendo o ademán de tocala. Viste capa e coiraza e leva o pelo longo, sen embargo carece das ás que a identifican noutras representacións; será para que non fuxa? «Fama volat » dicía Publio Virxilio Marón.

 

Imaxe: Mateo Fontán Couto

Imaxe: Mateo Fontán Couto

 

Para saber máis:
– BENITO GARCÍA, J.: Habladme piedras, Alfil, Pontevedra, 2013, pp. 76-83.
– FILGUEIRA VALVERDE, X.: A fonte da Ferrería de Pontevedra, Arquivos do Seminario de Estudos Galegos – VI, Imprenta Paredes, Santiago, 1933.
– JUEGA PUIG, J.: «La fuente de la plazuela del Muelle», en Asociación de Vecinos San Roque, Nº 4, Pontevedra, 2002, pp. 49-50.
– Ferraría, publicación da exposición sobre a historia da Praza da Ferraría, Outubro de 2014.


Comparte este Artigo!!!




Síguenos en Facebook

Síguenos en Google+
Síguenos en Twiter
Síguenos en Linkedin
Síguenos en Youtube
Síguenos en Pinterest
Síguenos en Deviantart
Subscríbete a nuestro canal RSS




Diseñado por PorGaliciaBaixo






Deseñado por PorGaliciaBaixo